Friday, July 8, 2011

අත්තම්ම දැං හොදටම නැහැදිලා බොලව්




(ගම් මැද්දට වෙංට තිව්න නෙලිගල ගෙදර යස ඉළංදාරි දෙංනෙක් උංනා. යස කිව්වට මොකෑ, මුං දෙංන එක විදිහක බානක්. ඒ වගෙමයි උංගෙ අප්පත් වසවර්තියා. කොල්ලො දෙංන කොරාපු මොනයං නොසංඩාල දෙයක් උනත් දැනගත්තනං හෙම උංට තඩිබානව.  ගමේ තවත් එකෙක් උංනා පුරසිද්ද කේලමෙක්. උගෙ නම නාමලා කියල හිටං. නෙළිගල ගෙදර කොල්ලො දෙංනා කොරපු අලුගුත්තේරුකමක් නාමලා, උංගෙ අප්පට කියල. උංගෙ අප්ප උංට තඩිබාලලු ඒකට. ඒ විතරක්යෑ උංට එහෙං ආයේ බත් කන එකටත් තහංචි දාළලු.


තමං කොරාපු අලුගුත්තේරුකම අප්පයෙ කණට ගියේ නාමලාගෙං විත්තිය මුං දෙංන දැනගෙන ඔංන. නාමලා හවහ වෙද්දිං ගැරැබ්බැද්දෙ කඩේට එන වග දංන හංදා මුං දෙංනා දැං ඔංන එතන රැකගෙන ඉංනවා, උගෙං වාඩුව ගංට

ඔංන බොලව් මේ වගක් නොදංන නාමලා කඩේ ළගට ආවා විතරයි අර නෙළිගල ගෙදර කොල්ලො දෙංනා භූතයා ගැහුව වගේ තඩි බාංට තියා ගත්ත නාමලාට. මේ වෙලාවේ කඩේ ළග එකම ගාල ගෝට්ටියයි. අත්තම්මත් බැරි බැරි ගාතෙංම මොකදෑ වෙංනෙ කියල හිටං බලංට මිදුලට ආවා. මේ වෙද්දිං ඉළංදාරි දෙංනගෙං බඩකට පුරා කෑව නාමලා තල්ලුවෙච්චි අත්තකම්මයේ මිදුළට. උගේ පස්සෙං වැටුන කොල්ලො දෙංනා ඌට තවත් ගුටියක් දෙකක් දීලා හිටං මෙංන මේම කිව්වා බෝම සැර පරුස විදිහට,


නාමලා ගෙරියා, ඔය වගේ ගෙරි වැඩ ආයෙවත් කරංට එපා.


අත්තම්මත් මේක බෝම අවධානෙං අහං උංනා. බලුප් ගහේ එළියෙං නාමලාගෙ තඩිස්සි වෙච්චි මූණත් දැක්ක.)


ඉතිං බොලව් ඔය කතාව ඔච්චරයි.අත්තම්මගෙ ගෙදර තියෙංනෙ ගැරැබ්බැද්දෙ කඩේට  පාතිං වෙංට. පාරෙං පල්ල. කඩේ ළග වෙන කෙරැවාවල් සේරම අත්තම්මයෙ ගෙදෙට්ටත්  ඇහෙනව. ඒ මදිවට ගේ ඉස්සරහිං තිව්න ගංසභා පාර කොංකිරිට් කොරල හංදා දැං  වාහන යංටත් ඇහැකියි ඕං. උංදැයේ ගේ ඉස්සරහ ලයිට් කණුවෙ දැං බලුප් එක‍කුත් පත්තු වෙනවා. ඒ හංදා උංදා දැං ඒකට කියංනෙ බලුප් ගහ කියල හිටං ඕං. ගැරැබ්බැද්දෙ කඩේ ළග වෙච්චි කොයි කාරිණාවත් අත්තම්මට බෝම යසට ඇහුණා.


අනේ අපිටනං ඔය අනුංගෙ දේවල් අහවල් දේකටදෑ, ඒ උනාට බං මොකදෑ ඔය සිද්ද වුනේ?’


 කියල හිට තමයි උංදැයේ කණට හොරෙං ලිස්සලා ගියපු ‍කඩේ ළග සිද්ද වුනු කොයිකක් හරි අත්තම්ම ඔය කොයිං කුඩම්මගෙං එහෙම අහගත්තෙ.


ඉතිං බොලව් ගැරැබ්බැද්දෙ කඩේ ළග නානප්පකාර දේවල් සිද්ද වෙච්චි වගත්, ඒ කෝක උනත් අත්තම්ම කොහෙං කොහොම හරි කණට දා ගත්තු වගත් බොලාට දැං පැහැදිලියි නෙව.


ඉතිං උඹලට කියංට අත්තම්මට විස්ස විද්දියාලෙක නොගිය අඩුව මකා ගංට  තරං දේවල් කඩේට පල්ලෙං උංනු හංදා අද්දියනෙ කොරංට ලැබුන කියමුකො. ඒ විතරක් යෑ කොල්ලො ඔලොක්කුවට වීසි කොරාපු කෙහෙල් පොතුයි බුලත් හපහෙමත් අත්තම්මයේ මිදුලටම වැටුන. ඒත් බොලව් උංදැ කවමදාවත් කොල්ලංට හිත රිදෙංට වචනයක් කියව්වෙ නෑ. උංදෑ ඒ හැමදාමත් බෝම බැගෑපත් විදිහටමේම කිව්ව,


අනෙ මයේ අප්පච්චිල ඔය වැඩේ ආයෙවත් කරංට එපා.


ගමේ කොල්ලො ඉදල හිටල එහෙව් අරියාදුකං  උංදැට කොරව්වා. ඒ කොයි වෙලාවෙත් උංදෑ කිව්වේ,


අනෙ මයේ අප්පච්චිල ඔය වැඩේ ආයෙවත් කරංට එපා.


හැබැයි උංදැගෙ තිව්න මේ අහිංසකකම හිංදම ගමේ කොල්ලො බෝම ලෙංගතුයි උංදැට. අත්තම්මයෙ කටෙං මේ වෙව්ලන වචන ටික අහන එක උංටත් එක අතකට පිරිත් ටිකක් ඇහුව ගානට දැනුනා.


නෙළිගල ගෙදර කොල්ලො දෙංනා නාමලාට තැලුව දවසට පස්සෙංදා ඉදං ගමේ කොල්ලො අත්තම්මව ඔලොක්කුවට ගංන එක වැඩි උනා. ඒ මොකෑ දංනවද? නෙළිගල කොල්ලො එදා කීව පදයකුත් එහෙව් වෙලාවට අත්තම්ම කියංට අරං නෙව. මුලිං උංදෑ කිව්වේ,


අනෙ මයේ අප්පච්චිල ඔය වැඩේ ආයෙවත් කරංට එපා.


කියලා නෙව. දැං උංදෑ කියංනේ, අර එවුං කියාපු පදේකුත් ඈදලා හිටං මෙංන මේම.


අනෙ මයේ අප්පච්චිල ඔය ගෙරි වැඩේ ආයෙවත් කරංට එපා.


උංදෑ හැරමිටියට බර දීගෙන කට වෙව්ල වෙව්ල අළුතෙං ගෙරි කෑල්ලත් අමුණලා ඔය පද ටික කියන එක කොල්ලංට බඩ අල්ලං හිනා යන කාරිණාවක් වෙලා.


එක දවසක් අත්තම්ම බලංට පොඩි මාමා ඒයහ ආව. ඒ අවුදිං හිටං පංසලට පූජා කොරංට හිතං ඉංන  බෝගහලියද්ද කුඹුරු කෑල්ලේ ඒ වැඩ ඉක්මං කොරමු කියලත් අත්තම්මට මතක් කොරා.


එතකොට පොඩි මාමට අත්තම්ම වෙව්ල වෙව්ල කිව්වා,


ඔව් පොඩි පුතේ නැත්තං විපස්සි හාමුදුරුවෝ අපිවත් මහ ගෙරි වැඩ කරන උං ගානට හිතයි.
කියලා.


අත්තම්ම කීව ගෙරිකතාව ඇහුණු පොඩි මාමට හොදටම ලැජ්ජා හිතිලා, කවදාවත් නැති විදිහට කෝපෙං උංදැට මේම කියපි,


ගෙරි වැඩ. අපෙ අම්ම ආයෙවත් ඔය කණට ඇහෙන හැම එකම කියවංට එපා. ඕව රස්තියාදු කොල්ලො කියන කුණු හම්බ.

ළගකදි ඉදං කොල්ලංගෙ නක්කලේ වැඩි වෙංට හේතුව හෙනං මේ වචනේ මොකක් නමුත් වැරැද්දක් වග වෙංටෑ කියල හිතිලද කොහෙද අත්තම්ම ‍ඇස් දෙකත් ලොකු කොරං පොඩි මාමා දිහා බලං උංනා.




(කතාව ඔච්චරයි බොලව්. ඒකෙ හිනා යංට තරං රසකතාවක් නෑ, නෙවෙද? ඒත් උඹලට කියංට එදා නෙළිගල ගෙදර කොල්ලො දෙංනා නාමලාට තඩිබාලා අහවර වෙලා කිව්වෙත් පස්සෙං පහු අත්තම්ම කියංට ගත්තෙත් ගෙරියා කියලා නෙවේ බොලව්.  ගෙ අකුර නෙවේ කැ අකුර ආයිබොවං.)


Wednesday, April 27, 2011

අහක යන සරුපයි

ආයිබොවංට කාලෙකිං සුරාලගේ ගේ දිහාවේ සිද්ද වෙච්චි කතංදරයක් අමුනංට බැරි උනා හැබෑමයි. දැං උන්දලව මතකත් නැතිව ඇති නේද උඔලට. මෙදා කියංනේ ලොක්කගේ කතාවක් ඔංන. ලොක්ක කොහොම එකෙක්ද වග අමතකනං කියවපල්ලා මේකයි, ඊට පස්සෙං පහු මේකයි. දැං දංනව නෙව ලොක්ක ගැන සහසුද්දෙංම.

බොලව් ලොක්කගෙ අඹුව වෙච්චි කාංති කෙල්ල ගැන මේ වෙද්දිං ගංතුලානෙ කයි කතංදර ඕසෙට. ඒ කයි කතංදරේ කොයි එකක වුනත් බේකරියෙ මුදලාලිත් කොනක වෙංට ගැවීලා හරි උංනා. ආයෙ ඉතිං අමුතුවෙං ඒවා කියංට ඕනයෑ උඹල වගෙ අං ගිලපු එවුංට. ලොක්කා නැති අල්ලපනල්ලේ මුදලාලි කඩුල්ල පනිනවා කිව්වොත් පැහැදිලියි නෙව.  මේ කොයි කතාවත් ඉතිං අමරයා, පද්මෙට හෙම බෝම වටන කියන නිමිති වෙච්චි.

ඔංන බොලල්ලා මේ කියන දවස්වල තමයි රේඩියෝ බාස් මිය පරලොව ගියෙ. (ආ... බොලා දැනගංනවනං රේඩියො බාසුත් එක විදියක එකෙක්. උංදෑ ගැනත් අපූරු කයිකතංදර ගෝනියක් විතර තියෙනවා. මේ  අංතර් ජංජාලෙට බිල් ගෙවන කෙරුවාව මඩියට ඔරොත්තු දෙන තත්වෙක දිගටම තිවුනෝතිං හිට ඒවත් පස්සෙං පසු කියංනංකො. (රේඩියො බාස්ගෙ මිනිහටම වෙං වෙච්චි සමහර පරිබෝජන වස්තු තිවුනා. ඉං එකක් තමයි උංදෑ ඇදපු දිගත් නැති කොටත් නැති, දණිය වැහෙංට ඇදපු ‘මං එනකං යං කලිසං’ තාලේ කොට කලිසම.  මුලු පැත්ත පලාතෙම මෙහෙව් ඇදුමක් ඇංද එකම එක නාකි උංදෑ රේඩියො බාස්ම විතරයි. ඉතිං ගමේ උං මේ තාලේ කලිසං කොටවලට කිව්වේ ‘රේබා කලිසං’ කියලා හිටං ඕං. ‘රේබා’ කී‍වේ රේඩියෝ බාස් කියන එකේ මුල් අකුරු අරං හිටං කොට කොරලනෙ ආයිබොවං.) ඒ වුනාට බොලාලට කියංට දැංනං මේ ගංවලත් රේබා කලිසං කාරයෝ ඕසෙට. ඒ විතරක් යෑ, මේ බවලත් උදවියත් අදිනවා බොලව්. උං ඒවට කියංනේ ‘තිරි කුවාටර’ ද මොකක්දො ඕං. මටනං ආයිබොවං ඔය තිරි කුවාටරකාරයෙ ඇහැ ගැටුනොත් සුරුස් කියද්දිං මතක් වෙංනෙ රේබා කලිසං ඕං.)

දැං ඒවයිං කාරි නෑ කියංට ආව කතාව කියල ඉංනංකො. ඉතිං ඔංන රේඩියො බාස්ගෙ මුර්ත කලබරෙට තනි රකිංට රාත්තිරියට ගමේ උං යනව විතරක් යෑ බූරු ගහනවා, ඕබි ගහනවා, රට බීම බෝතල් හිස් කොරනව, විට හපනවා, තව අවලං කතා කියනව. ඔය වගේ අමුතුම රාත්තිරි ටිකක් ගමේ ගෙවිල යනවා ඕං. මොකාගේ වුනත් මුර්ත කලෙබරේ වලපල්ලේ දානකං ගමේ ඕම තමයි ආයිබොවං. හිතුමනාපෙට කංට බොංටත් තිව්නා. ඒක සමහර කොල්ලො කුරුට්ටොංට හරියට පෝසන සතියක් වගේ.

මෙහෙව් රාත්තිරියක ඉතිං ඔය කීව ලොක්කත්  අර අමරෙ පත්මෙ උංගෙ තලේට වෙලා අවලං කතා අහං  විරිත්ත විරිත්ත ඉංනව. කතා කිව්වට මොකද මෙවුං කොරව්වේ උං තලේ ඉංන එකෙක්වම ඔලොක්කුවට අරං මඩවන එක. දැං ඉතිං මුංගේ කතාවලට ඉඩ දීලා මහ රාත්තිරියත් ගෙවිලා හිටං හෝරාවක් විතර ගෙවිලා. දැං ඉතිං මුංගෙ සූජානම ලොක්කව මඩවංට. මේ මහ රාත්තිරියේ කාංති කෙල්ල තනි කරලා හිටං ලොක්ක රේඩියෝ බාස්ලයෙ දිහාවෙ. ඉතිං කාංති තනිපංගලමෙ ගෙදර ඉංන එකයි ඒක හිංදම වෙංට පුලුවං කියලා අනුමානෙට හිතෙන දේවල් ගැන තමයි දැං මෙතන ඊළගට කතාවෙංට ගත්තෙ. ලොක්ක ඉතිං මේවා තේරුං ගංන එකෙක්යෑ. එක අතකට ලොක්කව මඩවංටමත් නෙවේ බොලව්, ලොක්කට මේව ගැන ඉඟි කොරලා හිටං සිද්දවෙන අපවාදෙං ගැලවෙන විදිහක් කල්පනා කොරංට ලොක්කව පොළඹවංටත් එක්කයි දැං නඩේ උං වෑයං කොරංනේ. ඒ කියංනේ ලොක්කට පරච්ඥාව දෙංට. එහෙව් සමාජ අවබෝදෙ ඇතිකරන දේවලුත් මෙහෙව් තැංවලදී සිද්ද වෙනවා අයිබොවං. ඒකට සුජානං වෙංටත් එක්කං, ඉතිං එක එක විදිහේ උපහැරන කතා හෙම කියවලා අමරෙ කියන එකා ලොක්කට කියව්වා,

‘හැබෑට ලොක්කා දැං දෙගොඩහ ජාමෙත් පහුවෙලා, අර පාලු පැලේ කාංති නඟා තනියෙං නෙව. උඹ නැති අල්ලපනල්ලෙ අහක යන සරුපයි ගෙට ගොඩ වෙංටත් බැරි නෑ නෙව; නරකද දැං උඹ ගියෝතිං.’

එක අතකට ලොක්කට මුං තලේ විරිත්ත විරිත්ත ඉංන එක අලි විනෝදයක් වෙච්චි එකේ ඒක නැති කොර ගංට ලොක්ක කැමති වුනෙත් නෑ. ඒ හංදා ලොක්කා බොක්කෙ තිබ්බ දේ සබාවෙ මැද කියපි. ඒක ඇහුනම අමරයට රෙද්දෙ රෙවුන වගෙ දැනුන. මෙංන මේමයි ලොක්ක කිව්වේ: හරියට වක්කඩෙං වතුර ගලංනැහෙ,

‘හ්ම්, සරුපයි රිංගංට මයෙ ගෙට......... ඒව කොහෙද......මුදලාලි එක්කං. මං නැති වුනාට, උන්දෑ  ඒව බලාගනී’

Wednesday, April 13, 2011

උදාවන අලුත් අවුරුද්ද...............................

 ‘අහේතු කාලෙන කජ්ජේන පුහුලං ලු නොවෑ.


එහෙම කීවේ මොකෑ කියල දංනවද? මහනුවර දිහාවෙ යංට එපෑයෑ බොලාලා අවුරුදු බලංට. නුවර වීදී යටකොරං හිටං මහා ජන සංනිපාතේ.  මේ අද ඊයේ දවස් ටිකට දැක්ක දේවල් ටිකක් උඹලට කියංට; උංදැලැනං කයි බොලව් අවුරුදු, අවුරුදු ගානකටම ඇතිවෙංට.


උඹලට කියංට පහුංදාක නුවර මාර්කැට්ටුව ඇතුලේ කිරි සප්පයෙකුත් වත්තං කොරා ගත්තු ගෑණීයක් තොර තෝංචියක් නැතුව කරේ දා ගත්තු බෑග් මල්ලකුත් මිනිස්සුංට පෙංන පෙංනා ‍විලාප තියනවා. ඒ ඇත්ති‍ගේ ගංතුලානෙ ගතිය ඇදුං කඩමාලුවල ඉදං සර්වාංගෙංම පේනවා. බෑග් මල්ල කපල හිටං ඇතුලෙ තිව්ණ රුපියල් හත්දාහක්ම හොරකං කොරලලු බොලව්. අවුරුද්දට අඩු වැඩිය ගෙනියංට තිවුණ සල්ලි කියංනෙ. මිනිහෙක් සතෙක් කෑ මොර දෙංනේ මොකෑ කියලා විපරං කොරන එක අපේ රටේ ඇත්තංගෙ ජංම ගතියක් නෙව.  ඉතිං මේ ගෑණු උංදෑ දිහත් මේ මොකෑ කියලා  යන එන ඈයො බලනව. බැග් මල්ල කපලා හිටං අසමත්ජාතියෙක් සල්ලි ටික අරං විත්තිය කණ වැටුනම කවුරුත් කොරව්වේ මොකක්ද කියලා දංනවද? ගෑණූ උදවිය තමංගෙ බෑග් මල්ල ආරස්සා වෙලා තියෙනවද බැලුව. පිරිමි උදවියත් පස්ස පැත්තට තට්ටු කොරලා පොකැට් එක තියෙනවද බැලුව.  ඒ වුනාට මොකෑ රුපියල් හත්දාහ ගත්තු එකානං හොදට අවුරුදු සමරංට ලක ලෑස්ති වෙනවා ඇති මයෙ හිතේ.

අනිත් අතට ටවුමෙ ඇදුං කඩවලයි සුපැර් මාර්කැට්වලයි උංනු මිනිසු කංදරාව. මම දැක්ක නෙව,  මේ නුවර උං ගත්තු ඇදුං ආයිත්තං විතරක් යෑ අඩුම කුඩුම කෝකටත් හිලව්වෙංට දුංනෙ දාහ දෙදාහෙ කොළ නෙව. හප්පා...... බලාන ඉංදැංදිං ලාච්චු පිරිල ඉතිරෙනව  නෝට්ටු කොලවලිං.  මුදලාලි ඇත්තොලනං කයි අවුරුදු; අවුරුදු ගානකටම ඇතිවෙංට.


මේ දොලොස්වෙනිදා හවහ නගරෙදි දැකපු දෙයක් අහපල්ලකො. අවුරුදු අටේ දහයෙ තරමේ දරුවො දෙංනෙකුත් එක්කං උංගෙ අම්මයි අප්පයි ටවුමට අවුදිං. අවුරුද්දට අඩුම කුඩුම ගෙනියංට. මෙච්චර වෙලා එක්කහු කොර ගත්තු දේවල් පොඩි බෑග් මලු දෙකක දාගෙන හිටං පොඩි උං දෙංන එල්ලං ඉංනව. මුං උංනෙ රත්තරං බඩු කඩයක් ළග. මේ කොල්ලංගෙ අප්පගේ අල්ල උඩ ගෑනී ගලවල දුංනු කරාඹුවක්. මිනිහා අත දික්කොරං ඉංනව. ගෑණී අනෙක් කණේ කරාඹුවත් ග‍ලවනව. ‍උනුත් කයි අවුරුදු; අවුරුදු ගානකටම ඇතිවෙංට. නේද ආයිබොවං.

කොළඹ වීදියෙද කොහෙද තියෙන කැවිලි කඩේ අතිරස, මුං කැවුං ගංට තිවුන තදබදේ දැක්කනං. අනිත් අතට රටබීම සාප්පු ළග තදබදේ. වෙන මොකටද ඉතිං ඒවත්, අවුරුදු ගානකටම ඇතිවෙංට අවුරුදු කංට මිසක්.


---------------------------------------------
ඒ සංදියේ මේ ගංවල අවුරුද්ද පටං ගත්තෙ මෝඩයගෙ දවසටත් කලියෙං ආයිබොවං. අවුරුද්ද ගැන පයිංඩෙ කොහා කියංටත් කලියෙං කුට්ටම අනංට පටං ගංනවා ගොරක ගහ මුල. හයිය හක්තිය තියෙන ගස්වල ඔංචිල්ලා. වැඩියෙංම ඔංචිල්ලා බැංදෙ සියඹලා ගස්වල. රතිංන පුපුරණ සද්දෙ ඒ අස්සේ වටපිටාවෙ අවාරෙට පොල් වැටෙංනැහෙ ඇහෙංට පටං ගංනවා ඕං.  අංතිමෙ බක්මහ අකුණු ගානට හරි හරියට තරගෙට රතිංනා සද්දේ. ඒ විතරක් යෑ අතිරහ, මුං කැවුං, කොකිස් බැදෙන සුවද. ඔංන ඕවා දැක්කට දැණුනට පස්සෙං පහු තමයි කොහාටත් මතක්වෙංනෙ හුරුවං බාංට කාලේ නොවෑ කියල හිටං. කෝරලේ ගෙදර එරබදු ගහේ මල් පිපෙංට ගංනෙත් ඊට පස්සෙං පහුයි කියමුකෝ.


ඒව ඔක්කෝම ඔය කීව විදියට සිද්ද වෙලා දැං වැඩි කාලයක් නෑ බොලව්. ගොරක ගහ කපල දාලා දැං අවුරුදු පාලොහක්  විතර ගෙවුන. ගම පුරාම තිව්න සියඹලා ගස් පෝරණුවලට දරට කැපුව. මිනිසුන්ට ඒවයෙ තිව්න වටිනාකම අමතක වුනැයි කියමුකො.  මේ වෙනතුරා කොහා අහල ගං හතකවත් හුරුවං බානවා මටනං ඇහුනෙ නෑ ඕං. ඒ විතරක් යෑ රේඩියෝ ටෙලිවිෂොංවල කීවට පෙන්නුව ඇරෙංට එරබදු මලක් ඇහැ ගැටුනෙනං නෑ බොලව්.


දැං සොබාදර්මෙං කොහා වදවෙංට අරංලු. එරබදු මල් පිපෙං නැති එකටත් අපේ රටෙ මහදැනමුත්තො එක එක කයි කතංදර කියනවා උඹලත් දකිංට ඇති, අහංට ඇති, කියවංට ඇති මයෙ හිතේ. ඉතිං ආයිබොවං මට නං හිතෙංනේ ගංවල මිනිස්සුංට අවුරුද්ද දැනෙන හැටි වෙනස් වෙලා. එහෙමත් නැත්තං අවුරුද්ද එක්ක මිනිස්සු ජීවත්වෙච්චි රටාව වෙනස් වෙලා. මේ වෙනස සොබාදර්මයාට තේරුං ගංට බෑ. මේක කොහාට දැනෙංනේ නැතුව ඌ කොහේ හුරුවං බාංටද. එරබදු ගහට ඒ වෙනස තේරුංගංට බැරිකොට කොහෙද ආයිබොවං එරබදු ගහේ මල් පිපෙංනෙ. ඒ කාලේ අලුත් අවුරුද්දට මිනිස්සු හැබෑවටම සතුටු වෙනවා දැකපු සොබාදර්මයා මිනිසුත් එක්කං සතුටු වුනා. අවුරුද්දක් වියහියදමට තියෙන මිළමුදල අවුරුද්ද වෙනුවෙං වියහියදං කොරංනෙ අපෙ ඇත්තෝ හැබෑ සතුටකිංද? ඒකාලේ කැවුං ගෙඩියක් හදලා, ඇදුමක් කැඩුමක් අරං, රතිංනයක් දාල, ඔංචිල්ලාවක් නැත්තං රබං පදයක් ගහලා , දොළහ පෙතක් හරි ඔළිද ලෑල්ලක හරි කිරීඩාවක් කරල හිටං හීනියට ලබපු  සතුට මැද්දට කොයි තරංනං දේවල් බාහිරිං රිංගලාද ආයිබොවං


---------------------------------------------------
ඒ කොහොමිං කොහොම වුනත් අයිබොං  එරබදු ගහ මලිං බර කරංට තරමටම, කොහා හුරුවං බාංට පෙළඹෙන තරමටම මේ සිංහල දීපෙ ඇත්තංගේ හිත්වල සතුට ඇතිකරන අලුත් අවුරුද්දක්ම සිද්ද වෙංට කියලා හිටං ගැමියා ප්‍රාර්ථනා කොරනවා එහෙනං.

Thursday, March 10, 2011

හිත ගිය හිගුරු මල


පිංචි එතනා මළ පොතේ අකුරක් අදුරගෙන හිටං සද්ද කොරලා කියංට බැරි එකී වෙච්චි. ඒ වුනාට පිංචි එතනට ඇලේ දොළේ, ගහේ වැලේ, කැලේ, මලේ, සතා සීපාවගේ, රැහැයි නාදේ, හාතියල් වෙල් යායේ රැව් දුංන කුරුළු නාදේ, අව් කාස්ටකේ, වරුසාවේ, දූවිලි පුසුබේ විතරක් නෙවෙයි මෙකී නොකී  හැම තැනම  අකුරු වෙලා තිව්න කංදක් තරං දේවල් පපු කැනත්තට වැටහෙන විදිය බෝම තේරුං කොරලා කියව ගංට  සුවල්ප වැටහීමක් නෙවෙයිලු තිවුනේ ඕං. ආයිබොවං ඒ විතරක් යෑ. ඒ හැම දේම බෝම අගේට කවි කොරලා හිටං තාලෙට කියංටත් පිංචි බෝම දස්සයිලු. ඉතිං මේ කවිකාරිට බෝම මනාප වෙලා හිටං ලංදෙ දෙවැටේ පිංචිගේ හිත ගංට කියලා ගොං පස් අල්ලංට වගේ උංදෑ පස්සෙ වැටුනේ කවුද දංනවද ආයිබොවං. ඒ කාලේ ගමේ ඉස්කොලේ උංනු ලොකු ලොකු ඉස්කෝලේ මහත්තැංලු.

කොයි තරංනං දැනමුත්තෙක් වුනත් පිංචි එතනා ඒකිගෙ ආලවංතකම එහෙම ලේසියෙං පුදංට ගොහිං නෑල්ලු බොලල්ලා ලොකු ඉස්කෝලේ මහත්තැංට.

මේ කාලේ තමයි පිංවත්තේ ඉස්කෝලේ බෝම ජයට තිව්න කාලේ. කංනංගර මහත්තැං මද්ය විද්යාලෙ හදංට කලියෙං.

උඔ වගෙ එකෙක් ගමේ හදලා ආයෙත් මෙහෙ වරෙං

කියලා හිට තමයිලු ඒ කාලේ ‍සිදාදියෙං ඉස්කොලේ මහත්තැංලා ගමේ ඉස්කෝලවලට එවංනෙ. ඒ කියංනෙ, ඒ වගේම දැනුමැත්තෙක් ගමේ හදංට  කියන එකලු. හිතාපල්ලකෝ ඒ චිංතනේ කොයතරංනං උත්කුරුස්ටද කියලා හිටං. මේක වැරදියට ‍උච්චාරනේ කොරලා වෙන නොසංඩාලකං කොරාපු ගුරාලත් ඒ සංදියෙ උංනලු. මොකෑ තමං වගේ දැනමුත්තෙක් ගමේ හදංට ආව ගුරාලා තමං වගේ රූප සොභාවෙ උං තනලා හිටං පැදුරටත් නොකියා යංට ගිය කතා පිංචි දංන හිංදා.  ඒක ඒම වැරදියට තේරුං ගත්ත සමහර උං ගමේ බිංන බැස්සලු. ඔය මේ ගමෙත් සමහර තැංවල දැනුත් ඉංනේ එහෙව් ගුරාලා හැරමිටියට බර දීගෙන හිටං.

මෙහෙව් දේවල් මට කියලා දෙංනෙ මීරුප්පෙ මාම නෙව. මේව ඉතිං උංදැගේ ඉස්මරනේ අවුස්සලා, අල්ලසට බුලත්විටක් හෙම දීලා විතරක් යෑ ඒක වංගෙඩියේ කොටලත් දීලා එලියට ගත්තු දේවල් ඕංන. මීරුප්පෙ මාමා කියව්වේ පිංචි එතනා උංමාද චිත්තරා වගේ කියල හිටං. උංදැත් දැං වයසයි නොවැ සමහර විට උංමාද චිත්තරා දැකලත් ඇති. ඒ තරමට වයසයි උංදැටත්. ඒත් ඔය කීව කවියට  සීපදේට බෝම දස්ස හිටිවන කවිකාරි වෙච්චි පිංචි එතනා කෙනෙක්නං හැරමිටියෙං යනවවත් මංනං මේ ගං තුලානේ කවදාවත් දැකලා නෑ සත්තකයි ආයිබොවං.

ඔංන ඉතිං කතාවෙං ලංවෙංට බැරිවුනු සෙනේවංතකමට  පිංචිට තේරුං යන සීපදෙංම තේරුං කොරලා දෙංට තමයි දැංලොකු ඉස්කෝලේ මහත්තැං උත්සහ කොරංනේ. ඔංන දවසක්දා තනිපංගලමෙ ඇස්සර ගැටිච්චි පිංචි එතනට සිදාදියෙං ආව ලොකු ඉස්කෝලේ මහත්තැං  ඒ ගං තුලානේ සිරියාව පිංචිට ආදේස කොරල හිටං මෙහෙව් සී පදයක් කියනවලු,

හිගුරු මලයි පතනට දෙංනේ                 පිරිය
තිසරු සරයි විල මත පෙංනා                  සිරිය
සඳරු මවයි මුව මත මැවෙනා                සිරිය
බමරු පතයි අවසර රොං සුව                 රිසිය 

ඕක තාලෙට කියල හිට මීරුප්පෙ මාමා මට කියනවා,

පිංචිට ආගංතුක දෙයක් යෑ බොල කයිය, ඊට පස්සෙං පහු ඒකිත් කියාපි මේම
                                             
හිගුරු පෙති හළා පතනේ යාය            පුරා
තිසරු තටු හැලී විල මත හිදී                 බලා
සදරු මුහුන සගවයි කෙළවරේ            වළා
බමරු කුමට රොං උරනා පියුම්             තලා

ඒකෙං කියවෙලා තියෙංනේ සිදාදියෙං ආව ඇත්තංට සෙනෙහෙ පුදල ගමේ ගෑනූ වළේ වැටුනු හැටිලු
                                                       
තමං එහෙව් නොසංඩාල වැඩ නොකරන විත්තියත්, පිංචිට හැබෑවටම මනාප විත්තියත් තේරුං බේරුං කොරංට ඊට පස්සෙං පහු ලොකු ඉස්කෝලෙ මහත්තැං කියලා තියෙංනෙ මෙංන මේ සී පදේ,

හිගුරු මල සුවද නැහැයට        දැනෙනවනං
තිසරු විල රන දෑ‍හට          පෙනෙනවනං
රු  මුව සුවය  හිත කිති          කවනවනං
බමරු දුරිං ඉද රොං ‍බොන              ඕනතරං

ඒ ටික කණේ වැටුනට පස්සෙං පහු පිංචි බෝම පැහැදුනාලු නෙව ඉස්කෝලෙ මහත්තැංට. එදා ඉදං ඒ ආලවංතකම ලියලංට ගත්තලු. ආයිබොවංට මං කීව නෙව කමවදාකවත් මං පිංචි කෙනෙක් ගමේ දැකල නැති විත්තියක්. මං ඉතිං ඇහුවා මාමංඩියාගෙං,

මාමංඩි දැං ඉතිං ඒ පිංචි කොයි කියලා හිට.
උංදෑ කියාපි,

ලොකු ඉස්කොලෙ මහත්තැං කැටුං දීගතල ගියෑයිං පහු  මාත් නොදැක්ක එකී;  තෝ වගේ කජුකිරි කොල්ලංට කොහෙ ඇස්සර ගැටෙංටද බොල?

Wednesday, March 2, 2011

මද්දුවාගේ කුකුල් කේංතියේ හැටි

මතකද සුරා ගුරුංනාංසෙගෙ දෙවනි කොල්ලා මද්දුවා. උංගෙ අම්මගේ ගමෙංම මේකත් ගෙනාවා කියහල්ලකෝ ගෑනියක්. ඒ කියංනෙ කැතිගානාකදුරෙංම. උගෙ අයියංඩි ඒ කිව්වෙ ලොක්කා කාංතිව ගෙනාවෙත් ඒ ගමෙංමයි. දැං ඉතිං බාල කොලුවත් ඒ කිව්වෙ බාලෙත් උස්සං එයිද දංනෙ නෑ ඒ ගමෙංම එකියක්. ඒවා පස්සෙ බලමුකො. ඉතිං මේ මද්දුව කුකුල් කේංති කාරයා. ඉස්සර මේක ලොක්කත් එක්ක තිවුණ ආරෝව සුරා විසදව්ව හැටි මතකයි නෙව.  ඒත් මේකා මේ හොදට ඉංනවා, මේ තදවෙනවා.මේ තදවෙනවා, ආයෙ හොදයි.

කැතිගානාකදුරෙ පොඩි එතනගෙ දෝණියැන්දෑ මාලා. මේකා ඉතිං මුගෙ අම්මයේ, ඒ කියංනෙ ලමසගෙ මහ ගේ දිහාවේ, වත්ත පිටියට ගියෑයිං පස්සෙං පහු, ඇයි හොදයි කං පාපු එකියක් තමයි මාලා. හැමදාම දකින කුකුළයේ කරමලේත් සුදුයිලු නෙව. පුංචි සංදියේ හිටංම ඇස්සර ගැටිලා, සෑහෙන කාලයක් දැන ඇදිනිංකං තිවුණ හංදා, මේකට ඉතිං එක වහලක් යටට ආවත් මාලගේ වැඩි වෙනසක් දැණුනේ නෑ ඕං. ඒ හංදාම පොඩි පහේ ආරෝවල් හෙමත් ඇත්වෙච්චි. මොකෑ මද්දුවත් කුකුල් කේංති කාරයා නෙව. ඒකටම හරියංට මේ ගං පළාත්වල ආයිබොවං ඒ සංදියේ  ගෑණු, ගොළුබෙල්ලා කට්ට ඇතුළට රිංගංනහේ පොඩ්ඩ ඇත්තං ඒකිලාගෙ අම්මයෙ තුරුලට යංටම තමයි බලව්වේ. (ඒ සංදියේ බොලල්ලා, දැං ගෑණූ ‍ඒ අතිං හොදයි) ඒ හංදම ඇබිත්තං ආරෝවත් ලොකුවට අරං, කෙහෙවැලෙං අඹරලා හිටං හොම්බට දෙකක් මිනිහට කියලා ඇණ ගංන තැනට වැඩ සිද්ද කොරවා ගංනවා. ඉතිං මද්දුවාට කියලත් මේ යෝදී මාසෙකට හමාරකට සැරයක්වත් මේ ආසාව ඉස්ට කොරා ගත්තා. සුරා ගුරුංනාංසෙයි ලමසයි එක්කම, මහ ගේ ම තමයි මෙවුනුත් උංනෙ. ඉතිං මේ හඹේ සුරා ගොයියටත් ඇහුනා.

ඒ කාලේ නං මේ වගේ පුරස්නවලට සුරා බෝම අගේ ඇති උත්තර දුංනා නෙව. ඒත් මේ හඹේට හොට දාංට සුරා නෙවෙයි ඇහැක් ඇරලා බැලුවේ ලමසත් ඉතිං මේවයෙ වගක් ගත්තේ නෑ කියමුකෝ. ඒ උංදැයේ හැටි නෙව. අනික් අතට පොඩි සංදියේ ඉදංම මද්දුවා කුකුල් කේංති කාරයා වග ‍උංදැලත් දංනව. මේ නහුතෙට නගිනවා. ඩිංගෙං හොදයි. මේ හොදයි, ආයෙත් තහුතෙට නගිනවා. ඉතිං මේකගේ මැද්දට පැනල කොයි වළට යංට වෙයිද කවුද දංනෙ. ඊට මීට වැඩිය හොදයි නෙව කරබාං ඉංන එක.

ඔංන ඔය අතරෙ ඉතිං මාලා කැංදං ඇවිල්ලා හිටං පෝය හදවල් දෙක තුනක් ගතවුනාම මේකි ගැබ්බරත් වෙච්චි. දැං නං ඉතිං මාලට ආපහු කැතිගානාකදුරේ අම්මලාගේ දිහාවේ යංට තදිංම දොළදුක. කීප සැරයක්ම එහෙ යංට මද්දුවාට කිව්වත්; ‍ඒක උගේ මේ කණෙං රිංගලා අනික් කණෙං එළියට ගියා ඌටත් නොදැනීම.

ඉතිං මේ හංදාම මාලා, කොහොමිං හරි ලැවැංනක් අරං මද්දුවාට කියලා හොම්බට දෙකක් අන්නවා ගත්තා. ඒ කොරලා හිටං ඇදුං කඩමාලු ටිකයි, බඩගෙඩියයි උස්සං යංට ගියපි කැතිගානාකදුරේ. 

ඒ කොරලා හිටං, පොඩි එතනට; කදුළු පෙරාගෙන, එක දෙක කොරලා හිටං කියපි,

‘අපෙ අම්මා මද්දු හරියකට මාව බලංනේ නෑ. ඒ හංදා මං ගෙදර ආවා

කියලා හිටං.  පොඩි එතනත් ඉතිං වැලේ ගෙඩි වැලට බර නෑ කියලා හිටං මේකි තියං ඉංන බඩ ගෙඩිය ගැනවත් නොහිතා ඒකිව තියා ගත්තා කියමුකො.

ඕං ඉතිං දැං මද්දු තනියෙං රාත්තිරිය ගෙවනවා. හිතේ ජවෙං රාත්තිරියත් ගෙවුනා. දැං මුගේ කේංතිය අහවරයි. ඊට පස්සෙ රාත්තිරියේ නින්දක් නෑ මද්දුවට. ඇහැ ඇරුන හැටියෙම අත ගෑවෙංනෙ පැදුර. ඉතිං දෙවනි රාත්තිරියෙත් පැදුරෙ පලුවක්ම හිස්.  මුගෙ පපුව හෝස් ගානව; ඒ හිස් පළුව අත ගෑවුනම. ඉතිං මද්දු තීරණේ කොරා පහුවදා මාලා එක්කහු කොරාන එංට උදැහැනැක්කෙම කැතිගානාකදුරේ යංට. මොකෑ ගංටාරේ වදිද්දිවත් ගෙයිං පිටත් වෙංට ඕනේ කලු අප්පුගෙ අත්තමට යංට. මේ වැඩේ හංදා මාලත් කැටුං අවුදිං අත්තමට යංට වෙංනෙ හෝරාවක්වත් සුනංගු වෙලාම තමයි.
 
ඉතිං පහුවදා උදහැනැක්කෙම  මද්දු මාලගෙ ගෙදෙට්ට ගොඩ වෙච්චි. වෙනදටත් මාලා රොස් වෙලා හිටං කැතිගානාකදුරෙ ගියාම මද්දු කොරංනේ මේ විදිහම තමයි. හැබැයි වෙනදනං වේලකට නැංදම්මගෙ බතුත් කාල හිටං තමයි මාලවත් කැටුං ගෙදර එංනෙ.


මාලටත් බෝම සතුටුයි  මද්දු දැක්කම. ඉතිං මද්දුට නොපෙනෙංට වාං වෙලා අම්මට කිව්ව මද්දු ආපු වග. පොඩි එතනටත් සතුටුයි මද්දු ආව එකට.  ගෙදර උංදෑ බඩදරු උනාම සුවාමියත් එක්ක ඉංන එක නෙව වටිංනෙ. ඉතිං මද්දුත් මේකම තමා හිත හිතා උංනෙ. ඔය අතරේ පොඩි එතන මද්දු ඈදී ගෙන උංනු පිල්කඩ ළගට ආවා. අවුදිං හිටං බඩ දරු ගෑණියෙකුට සුවාමියා සලකන පිළිවෙල මද්දුට කියලා දෙංට තමයි හරි බරි ගැහුනේ.

ඒ අල්ල පනල්ලේ මද්දු කියනවා,

‘නැංදංමා මාලට එංට කියාපල්ලකො. මං මේ උදැහැනැක්කෙම ආවෙ මට අත්තමකට යංට තියෙනවා. ඒ හංදා වැඩි වෙලා හිටිංට විදිහක් නෑ.’

කියල. දැං මද්දුවාට අර පරණ සිද්ද වෙච්චි දේවල් ඔක්කම අමතකයි. ඒ උගෙ හැටිනේ.

ඒ උනාට මොකො මොන හදිස්සිය තිවුනා වුනත් පොඩි එතනට ඒව ඒම අමතක කොරලා හිටං මාලව පිටමං කොරංට බැහැ නෙව. මුං ඉංට ඕන පිළිවෙල කියල දීලා යවංටත් එපෑයෑ. හෙට අනිද්දට දරු මල්ලෝ එක්කං ජීවත් වෙංට ඉංන උං නෙව. ඒක හංදාම මද්දුට මාලා කැටුං යංට දෙංට කලියෙං පොඩි එතන මේ විදිහට කිව්ව.

‘ඈ මද්දු උඹත් එක්කං දීග ගියෑයිං පස්සෙං පහු මාලා ඔය කී පාරටද ආපිට ආවේ.’

මද්දුවට මේවයෙ වගක් තියෙන එකෙක් ඈ. ඒ හිංදා කියනවා.

‘ඒ ගැන ආයේ මොනවට කියනවද නැංදංමා. මාලාට එංට කියංට. මට සුනංගු වෙනවා.’

‘එහෙම කොහොමද, උඹ දංනවද මාලා පෙරේදා ගෙට ගොඩ වෙද්දිං මොනවද කියාන ආවේ කියලා හිටං, ඒ හංදා ඒකිව ඒම ඔනෑ විදිහට කැටුං යංට දෙංට බෑ.’

කියලා පොඩි එතන බෝම සැරෙං ඒ ගමන කිව්වා. මද්දුවත් කුකුල් කේංති කාරය නෙව. එහෙං අත්තමට යංට සුනංගු වෙනවා මෙතන වාද කොරව්වොත්. එහෙං නැංදංමා වුනත් ගෑණුංගෙං බැණුං අහංට. ඉතිං දැං මද්දුවගෙත් හීමාව පනිනවා පොඩි එතනගෙ මේ වැඩ හිංදා. මද්දුවත් ඇබිංදක් සුවරෙ වැඩි කොරලා ඇහුවා,

‘හා හොදයි කියාපං නැංදංමා, මොනවද මාලා කියං ආවේ උඹලට.’

උංදැත් හයියෙංම කියපි


‘කියං ආවෙද? උඹ ඒකිව හරියකට බලං නෑල්ලූ.

දැං මද්දුට හීමාව පැංනා. දැං මූට මතක් වෙංනෙ කුණු හංබ. ඒ ගමන මූ ඇස් දෙකත් ලොකු කොරලා, කට හීංකොරලා,  පොඩි එතනගේ ළගට බෙල්ල දික් කොරලා හිටං,

‘මට බලංට පුලුවං විදියට තමයි ඔය බලලා තියෙංනෙ. මං බලාපු හැටියට ඔය වෙලා තියන දේ මදෑ. උඹත් ඒනං.............. ඕකිගෙ ඇදුං ටික ගලවලා හිටං හොද.............ට බලා ගංනිං.’

ඒම කියලා මද්දුවා කලු අප්පුගේ අත්තමට ගියා.

Thursday, February 17, 2011

ලොකු අම්මගේ ජංම ගති

ආයිබොවංට, පහුවුන දාක වෙච්චි සංගදියක් කියංටයි ලක ලෑස්ති වෙංනෙ ඕං. මයෙ ලොකු අම්ම ඉංනෙ අපේ දිහාට වතු දෙකක් එපිටහිං වෙංට. උන්දැගෙ සරිරෙත් බෝම හයියයි ඇස්වහක් කටවහක් නැහැ හිතත් හයියයි. ඒ වුනත් මං ගෙවල් දිහාවෙ ඉංන වග දැන ගත්තොතිං හෙම ආයෙ දෙකක් නෑ උංදැට සිද්ද කොරවා ගංට ඕන කාරිය යංනෙ මයෙ පිටිං තමයි ඕං. ඉතිං උංදැගෙ ගෙදර උංනෙ උංදැයි ලොකු අප්පච්චියි දෙංනා විතරයි. කෙල්ලො දෙංනා දීග දීලා. කොල්ලා හමුදාවෙ. ඉතිං ඔංන බැරි වෙලා‍වත් උංදැගේ කටෙං,

‘පොඩි පුතේ මෙහාට වරෙං, මයෙ අප්පච්චී................’

කියලා කීවොතිං හෙම මම ලොකු අම්මලාගේ දිහාවෙ යංනෙ මොනව නමුත් සුමයක් උංදැට කොරංට බලාගෙනයි. පෙර ආත්මෙ ණයක්ද කොහෙද මයෙ හිතේ.

ඉතිං බොලව් මාත් ඉතිං එහෙම වෙලාවට විගහට ලොකු අම්මලායෙ දිහාවට ගොඩවෙනවා.

‘ඇයි ලොකු අම්මා, මොකක්ද කාරිනාව’

කියාගෙන හිටං. හැබැයි මම එහාට යංට සුනංගු වුනොතිං හෙම උංදෑ වීරිය අරං කෑ ගහංට තියා ගංනව ගමටම ඇහෙංට. ඒ උංදැගෙ හැටි මෙංන මේ විදිහෙ  උංදැටම උරුම ජංම ගති  නොයෙකුත් තිවුනා. ඉතිං මේ පහුංදාක වෙච්චි සංගදියත් උංදැගෙ මේ ජංම ගතියකට සංබංදයි. ඒක කියංට තනද්දියි මේ ටිකත් මතකෙට ආවේ. ඒවත් කියලම ඉංනංකො. කාලෙකට කලිං දාක අර මුලිං කීව සුවරෙං ලොකු අම්මා බිං කළුවර වැටෙන වෙලාවෙ මට කතා කොරලා හිට කිව්වා,

’මයෙ අප්පච්චී, ලොකු අප්පච්චිට සනීප මදි, මී දෙං හාතියල් වෙලේ ඉංනේ. ඒකා ඇරං අවුදිං වත්තෙං දිගෑලි කොරලා බැදහංකො’

කියලා හිටං. උංදැට වතු දෙකක් තිවුනා උඩහවත්තට ගියෝතිං මට ආයෙ එංට වෙංනෙ වල් ඌරංගෙ ඇගේ හැප්පි හැප්පි. ඒ හංදා මං කිව්වා,

‘හොදයි මං යංනං. හැබැයි මීදෙං බදිංනෙ පල්ල්‍වෙත්තේ ඔංන’

කියලා හිටං. ලොකු අම්මා කිව්වා,

‘අනේ මයෙ අප්පච්චි, එහෙමනං උඹ ගොහිං පල්ලෙවත්තෙං බැරිනං ඕනෑ වත්තකිං මීදෙං දිගෑලි කොරලා වරෙං.’

ඉතිං මං ඒම කොරලා රෑ බෝ වෙංට කලියෙං ගෙදර ආවා.

තව දවසක් ලොකු අම්ම මට කතා කොරා. ඒ කොරලා හිටං සල්ලිත් එක්ක බූලියක් දීලා මට කියපි ඒකෙං එකක් ලාබුතෙල් ගේංට කියලා හිටං. මම නිකමට කිව්වා,

‘මේකෙං එකක් ‍ලාබුතෙල් ගේංට තැංනෙකුඹුරටම යංට වෙයි’

කියලා හිටං. මොකෝ සම්පකාරේ තෙල් කඩේ තියෙංනෙ එහෙ හංදා. උංදා කීවා,

‘අනේ මයෙ අප්පච්චි, එහෙමනං උඹ ගොහිං තැංනෙකුඹුරෙං බැරිනං ඕනෑ කුඹුරකිං මේකට ලාබුතෙල් අරං වරෙං’

කියලා. මොකක් නමුත් උංදැට ඕනෑකරන කාරියක් කොරා ගංට ඔනෑ වුනාම මේ විදිහට අනික් එකා කියපු පදේ එක්ක ඒ පදේ කොට කොරලා හිටං වාක්කියක් හදලා කියන එක ලොකු අම්මට තිවුන තවත් ජංම ගතියක්.  ඒක නිරායාසෙංම ලොකු අම්මට කියවෙනවා. ඒකේ බරපතලක් ගංට දෙයක් නෑ බොලව්. ඒ හංදා තමයි මං මී දෙං බදිනවා ‘පල්ල්‍වෙත්තේ’ කියද්දිං උංදෑ කිව්වේ ‘පල්ලෙවත්තෙං බැරිනං ඕනෑ වත්තකිං’ කියලා. ඒත් එක්කම මං තෙල් ගේනවා ‘තැංනේකුඹුරෙං’ කියද්දිං උංදෑ කිව්වේ ‘තැංනෙකුඹුරෙං බැරිනං ඕනෑ කුඹුරකිං අරං වරෙං’ කියලා. ඉතිං ඒකෙං ලොකු අම්ම ඉඟි කොරව්වේ තැන කොතැන වුනත් උංදැගෙ කාරිය කෙරෙනවනං ඇති කියන එකනේ ආයිබොවං. ඉතිං ඒම කියද්දිං උංදැගෙ බැරිකම හංදා පොඩි සංවේගෙකුත් අවුදිං උංදැට ඔනෑ දේ කොරලා දෙංටම හිතෙනවා.

දැං ඉතිං කියංනංකො පහුංදාක වෙච්චි ‍සංගදිය. පහුංදාක රෑ මැද ලොකු අම්ම මං බුදිය ගංට ලක ලෑස්ති වෙනකොටම කෑ ගහනවා ඇහුනා අපේ වැට ලගටම අවුදිං.

‘පොඩි පුතේ, පොඩි පුතේ මෙහාට වරෙං මයෙ අප්පච්චී................

 කියලා.මොකැක්දෑ බොල මේ රාත්තිරියේ හදිස්සිය; මැදියමටත් කිට්ටු හංදා මාත් දිව්වා ලොකු අම්ම ළගට,

‘ඇයි, ඇයි ලොකු අම්මා...................’ කියාගෙන.

ලොකු අම්මගෙ එකම පුතා රාජකාරි කොරංනෙ හමුදාවෙ නෙව. බැලිංනං මේ රාත්තිරියේ ඒකා ඇවිත් නෙව හදිසියෙම ගෙදෙට්ට. තවත් උගෙ සගයො දෙංනෙකුත් එක්කං. මෙවුං  මොකද කොරංනේ මගිං කඩේකිංවත් මොකවත් බඩට දා ගංනේ නැතුව අවුදිං; ලොකු අම්මට කියලා රාත්තිරියෙ කංට මොකවත් තම්බංට කියලා හිටං. අම්මෙක්ට වාවනවා යෑ දරුවෙක් කුස ගින්දරේ ඉංන එක. ඉතිං මුංට කටට රහට කංට දෙංට මේ රාත්තිරියේ  ගෙයි හරියක මොකවත් නැති හංදා, මොනවා හරි ගෙංන ගංට මාව කඩේ යවංට තමයි ලොකු අම්ම මට කෑ ගාලා කතා කොරව්වේ. ළග පාත මොකෙක්වත් හිටියෙත් නෑ. ඒත් ලොකු අම්ම බෝම හෙමිං සුවරෙ පාත් කොරලා මයෙං අහනවා,

‘පොඩි පුතේ, මේ වෙලාවට කඩ ඇරලද අප්පච්චී................’ කියලා.
  
මම අහුවා ‘ඒ මොකෑ ලොකු අම්මා’ කියලා.

ඊට පස්සෙ පුතංඩියා සගයො දෙංනෙක් එක්කං ආව විත්තියත් බෝම ආඩංබරෙං මට කිව්ව. ආයිබොවං, මේ පැත්තේ  එහෙම මහ රාත්තිරිය වෙනකං කඩ ඇරං බලාන ඉංන තැං නෑ බොලව්. ඒ වුනාට ටවුමෙ කෙළවරට වෙංට ඉංන කරුපයියා මුදලාලි නිදා ගංනෙත් කඩේම හංදා මහ රෑ වුනත් දොරට තට්ටු කොරාම බඩුවක් මුට්ටුවක් ගංට පුළුවං. ඒක මතක් වුන හංදා මං ‍කිව්වා,

‘හැබැයි ලොකු අම්මා, කරුපයියගෙ දොරට තට්ටු කොරෝතිං නං කඩේ අරී. මිනිහා නිදා ගංනෙ කඩේමනේ’

ඒක ඇහුන ගමං ලොකු අම්මගේ අර කිව්ව ජංම ගතිය ඉබේටම මතුවෙච්චි. උංදැට ඉබේටම කියවෙච්චි,

‘අනේ මයෙ අප්පච්චි..............., එහෙමනං උඹ ගොහිං කරුපයියගෙං බැරිනං ඕනෑ ........යෙක්ගෙං සාඩිං ටිං එකක් අරං වරෙං’

Tuesday, February 1, 2011

ආලෙං මත්වුන බාලේ

වයසට නොගැලපෙන උංගේ ආස්සරේට වැටිලා අමාරුවේ වැටුන සුරාගේ බාල කොල්ල‍ ගැන මතකයි නෙව. අමතකනං තද කොරහල්ලා මෙතන.  ඉතිං මේ බාලේ  දැං ඉලංදාරියා වේගෙන එනවා. මේ ඉළංදාරි වයසට සමහර උං කීවේ “කොල්ලා බල්ල වෙන කාලේ” කියලයි ඕං. මේ කාලෙට ඉතිං කියංට තරමේ අසනීපයක් ඇති එකෙක් නෙවේනං හෙම, කොයි එකාගෙත් හිත්වල ආලවංතකං ලියලනවා. මෙහෙව් ඉළංදාරි ගොං ඉතිං පොල් පැල දිහාවට හැරෙංට ගංනවා නෙව.   ඕං ඉතිං දැං බාලෙටත් ගැහුව මදන විසේ. එ‍්ම කීවාම කාටත් තේරුං ගංට පාසුයි‍ නෙව.  වැඩි හෙවිල්ලක් බැලිල්ලක් නැතිවම බාලේ, “හිත ගිය තැන මාළිගාව” කියලා හිටං තෝරා ගත්ත කියමුකො එගොඩ ගමෙං ඉස්කෝලෙට ආව කෙල්ලක්ව. ඒකිගෙ නම ලලිතා. දැං ඉතිං බාලේ මේ දැරිවිට පේංට ඉගි බිගි පානවා. ආලවට්ටං දානවා, මේ විදිහට ලීලේ පාංට ගත්තා තමංගෙ හිතේ තියෙන ලෙංගතුකම ඒ දැරිවිට පෙංනංට. ඒත් බොලව් මේ දැරිවි ඒම පාසුවෙං නම්ම ගංට පුළුවං එකියක් නෙවේ ඕං. බාලේ සෙනේ පානකොට මේ දැරිවි පෙනේ පාංට ගංනවා, ගස්සනවා, රවනවා, ඒ විතරක් යැ බණිංටත් ගත්තා. 


ඉතිං මේ දැරිවිගේ හිතේ තිව්ණේ කොහොමිං කොහොම හරි විභාග පාස් කොරලා හිටං අම්මා අප්පටත් නම්බුවක් වෙන විදිහේ රස්සාවක් හොයා ගංට විනා පරස්තාවම නෙවේ ඕං. දැං ඉතිං ඉස්කෝලෙයි, දෙවැටෙයි කංදෙයි, ලංදෙයි හැම තැනම ඉදං මේ දැරිවිගෙ හිත ගංට බාලේ කොරන විකාර මේකිට දැං වදයක් වෙච්චි. ඒ විතරක් යෑ ඉස්කෝලේ මේකි යන එන හැම තැනම මේකා වහං වෙවී යංට ගත්තා බොලව්. මුංගේ ඉස්කොලේ වැසිකිලිය තිව්නෙ ඈත ලංදක් දිහාවට වෙංට. ලලිතා දොට්ට පිළට ගියත් මූ ලංදෙ වහං වෙලා අහලිංම ඉදලා තියෙනවා නෙව හැබෑටම. සමහර දවස්වල කාටත් හොරෙං හවහට ආයෙත් ඉස්කෝලෙට අවුදිං ලලිතගෙ පුටුවේ වාඩි වෙලා ඉංනවා.

එක අතකිං ඉගනීම කඩාකප්පල්වෙනව. ඒ මදිවට මේකි බාලෙට වැඩි මනාපෙකුත් නෑ. අනික් අතට ලොකු ඉස්කෝලෙ මහත්තයට මේවා ආරංචි උනොත් හෙම ඉස්කෝලෙමුත් දොට්ට දානවා සිකුරුයි. මීට කලියෙං එහෙම දේවල් ලොකු ඉස්කොලෙ මහත්තැං කොරලා තියනවලු ඉස්සර උංන තැංවලදී.

ඒ හංදා ලලිතගේ හිතේ වැඩියෙංම බය තිව්නේ ඉස්කෝලෙං දොට්ට දායි කියල කීවොත් වරදක්ම නෑ. දැං ලලිතට ඕනෙ බාලෙගෙ කරදරෙං  ගැලවෙංට. ඒ හංද මේකි මේ පලහිලව්ව ඉස්කොලේ හාමිනේ කෙනෙකුට කියපි. නිකං නෙවේ අඬ අඬා.

‘අනේ ඉස්කොලේ හාමිනේ මේ කරදරේ හංදා මාව ලොකු ඉස්කෝලේ මහත්තයා ඉස්කොලෙමුත් දොට්ටදාවි’

කියලා හිටං අඬංට ගත්තා. ලලිතත් ඉතිං ඉස්කෝලේ හොද දැරිවියක්. ඉගන ගංටත් මනාපයි. ඒ හංදා ඉස්කෝලෙ හාමිනෙත් ලලිතට මනාපයි.

ඉතිං ඉස්කොලෙ හාමිනේ දැං මේක ලොකු ඉස්කොලෙ මහත්තැංගෙ කණේ නොවැටෙන විදිහට විසදංටයි ලක ලෑස්තිය. මොකෑ මේවා නියපොත්තෙං කඩලා දැම්මාම ලේසියි. පොරවෙං කොටංට තියා ගංනවට වඩා. දැං ඉතිං මේ උංදෑ බාලෙයි, ලලිතයි  ගෙංන ගත්තා ඉස්කෝලේ කවුරුවත් නැති ඉසව්වකට. බාලෙට ඉතිං සිද්ද වෙංට යන දේ හිතා ගංට පුළුවං වෙච්චි. බාලෙට දැං ලලිතා ගැන තරහත් එක්කලා. දැං ඉස්කෝලේ හාමිනේ නඩුව විසදනවා, දකුණු අතේ තඩි පොල්ලකුත් තියෙනවා. ලලිතා බයවෙලා ඉංනෙ ඉස්කොලෙං දොට්ට දායි කියලා නෙව. ඉස්කෝලේ හාමිනේ බාලෙගෙං අහනවා;

‘මේ ලලිතා උඹේ නොසංඩාල වැඩවලට බයවෙලා ඉංනෙ ඇයි කියලා උඹ දංනවද බූරුවා.’

කියලා හිටං. මූ අර සමාජ ආස්සරෙං උත්තර දෙන එකා නෙව.  මූට මතක් වුනේ එහෙම එකක්. බාලේ බෝම ගරු සරුව කියනවා,

‘එහෙමයි මම දංනවා ඉස්කොලේ හාමිනේ, ඒත් මගෙං ඒම දෙයක් දැංම සත්තකටම වෙංනෙ නෑ ලලිතා’

කියලා. මේ හතර බීරි කතාව ඉස්කොලේ හාමිනේටවත් ලලිතටවත් තේරුං ගියෙ නෑ නෙව. ඉස්කෝලේ හාමිනේට මේක දැනගංටත් ඕනේ. ඒ හංදා කියාපි මේ විදිහට,

‘කියාපිය බලංට උඹම, ඔය කීව කතාව තේරුං කොරලා ආයෙත් සැරයක්’ කියලා බෝම කෝපාවිස්ට වෙලා හිටං.

ආයෙ දෙකක් නෑ දකුණු අතේ තියෙන පොල්ලෙං කනවට වැඩිය හොදයි මම දංන දේ කියන එක කියලා හිතපු බාලේ කියනවා

‘ඉතිං මං ලලිතට කීවා යෑ දැංම දීගෙක යං කියලා හිටං

‍බාලේ දුංනු උත්තරෙං ඉස්කොලේ හාමිනේට කියාගංට බැරිතරං ලැජ්ජා හිතුනා. ඒත් එක්කම නහුතෙට තදවුනා. ඒ හිංදා තරහෙං පුපුර පුපුර වෙව්ලන ගමං ඉස්කෝලේ හාමිනේ වං අතෙං බාලෙගෙ දකුණු කණ ඇඹරුවා, බාලෙට මූත්තරා වෙන ගානට. මොකෑ, ඉස්කොලේ හාමිනේ හිතව්වේ ලලිතගේ ඉස්කෝලෙ ගමනත් මේකගෙ වැඩ හංදා නතර වෙයි කියලයි. ලලිතා බය වුනෙත් ඒක නිසාවෙං නෙව. මේකගේ තියෙන නොසංඩාලකමට මේකා හිතංනේ වෙන කුණුහරුපයක්. ඉස්කොලේ හාමිනේ බාලෙගෙං  බලාපොරොත්තු වුනේ මේවා ලොකු ඉස්කොලේ මහත්තැංගේ කණ වැටුනොතිං හෙම ලලිතා ඉස්කොලෙං දොට්ට දායි කියන එක. බාලේ දීපූ උත්තරෙං පස්සේ දැණුන ලැජ්ජාවත් එක්කලා ඉස්කොලේ හාමිනේ අංදුං කුංදුං වුනා, ඒ හිංදම කියංට ඕනෙ මොනවද කියලත් අමතක වෙච්චි. ඒත් එක්කම  හිතේ තිබ්බ දේ බාලෙට කිව්වට මොකෑ ඒක කියවුනේ සමහර වචන නැතුව  බාගෙට.


ඉතිං බාලේ දංනවායෑ ඒකෙ වගක්. ඉස්කෝලේ හාමිනේ වචන අඩුවෙං කියාපු පද ටික   ඊළගට  ඇහුනම බාලෙට මතක් වුනේ වෙන දෙයක්. අංදුං කුංදුං වෙච්චි ඉස්කොලේ හාමිනේට ඊළගට කියවුනේ මෙහෙමයි,

‘මම අහන්නේ බූරුවො, උඹ දංනවා නෙවෙද, ලලිතා දොට්ට දැම්මහම මොකද වෙංනෙ කියලා හිටං

මොකද මේ දැරිවිගෙ ඉගෙනීම කඩා කප්පල් වෙනවා නෙව. ඉස්කොලෙ හාමිනේ හිතංනෙ ඒක නෙව. 'ලලිතා ඉස්කෝලෙං දොට්ට දැම්මහම මොකද වෙංනෙ' කියලා හිටං අහංට හිතුවට ඉස්කොලෙ හාමිනේට කියවුනේ "ඉස්කෝලෙං" කියන පදේ නැතුවයි. 

මේක ඇහුණ ගමං බාලෙට කණ අඹරපු එක අමතක වුනා. තරු පෙනුනා. හීං දාඩිය දැම්මා. මොකද බොලල්ලා  මේකා හිතුවෙ ලලිතා දොට්ට දාංට ගියාම මේකා හොරෙං බලාන හිටපු එකත් ඉස්කොලෙ හාමිනේ දැනගෙනයි කියලා. දැං ඉතිං මේක ලොකු ඉස්කෝලේ මහත්තයා දැන ගත්තෝතිං හෙම විසුමක් වෙංනෙ නැතිවග බාලෙට හිතුනා. ඊට පස්සෙ සිද්ද වෙංට පුලුවං දේවල් බාලෙට සුටුස් ගාද්දිං මැවිලා පෙනුනා. ලලිතා දොට්ට දානවා බැලුව එක දැන ගත්තෝතිං බාලේ ඉස්කෝලෙං දොට්ටදාවි කියලා ඌට හිතුනා. මේක හැමෝම දැනගෙන වහකංට වෙයි කියලා බාලෙගෙ ඉහමොළ රත් වුනා. ඔංන ඔය විදිහට ඉස්කෝලෙ හාමිනේ පද අඩුවෙං කියාපු දේට  කලබල වුනු බාලේ ඉස්කෝලෙ හාමිනේ ඉස්සරහ වැද වැටිලා, බැගෑපත් වෙලා මෙහෙම කිව්වා.


'ලලිතා දොට්ට දාද්දිං මම ඒ අහලිං වහංවෙලා උංන බව හැබෑව. ඒත් මං මොනවාවත්ම දැක්කෙ නෑ ඉස්කෝලෙ හාමිනේ' 

මේ නොසංඩාලයා කියන මොකකවත් අගක් මුලක් නොදංන ඉස්කොලෙ හාමිනේ නඩු විසදිල්ල පැත්තක තියලා, බාලෙට අතේ තිව්න පොල්ලෙං නෙලුවා පිට මැදටම.


ප ලි -  මුල් ලිපිය පළකර පැයකට පමණ පසු සංශෝධනයකට ලක්කරන ලදී.